طريق الأسكندرية الصحراوي تقريباً عمليات تجديده خلصت ومبقاش فيه ال U-turns القديمة اللي كانت سبب في معظم حوادث الطريق وبقى عشان تلف وترجع لازم تخش في الservice lane وتطلع الكوبري اللي بينزلك الناحيه التانية في الservice lane الناحية التانية ومنها تقدر تخش على الطريق السريع من الحارة البطيئة وبكده حجم الحوادث هيقل بشكل ملحوظ إن شاء الله. لأن زمان مكنش في service lane أصلاً وكانت الناس بتلف من الU-turns القديمة من الحارة السريعة وتخش في الأتجاة المعاكس على الحارة السريعة تقوم لابسة في العربيات اللي جاية سريع أو وهي بتبطأ عشان تلف كانت العربيات اللي جاية من ورا بتلبس فيها.
طب فين المشكلة يا عم وحوادث ايه اللي هتحصل؟ الأسبوع ده كنت راجع من الساحل وعاوز أخش ماستر الناحيه التانيه رحت داخل الservice lane بعد الرست هاوس وطلعت الكوبري عشان أنزل الناحية التانية وأنا على الكوبري وبعد اللفة لقيت تريلا جايه في المعاكس بسرعة وكنت هلبس فيها ويا أنا يا هو كنا هنترمي من فوق الكوبري بسبب الحادثة اللي كانت هتحصل! المهم خلصت قعدتي في ماستر وطلعت على الطريق اتجاه أسكندرية طبعاً وطلعت أول كوبري قابلني عشان ألف وأرجع في أتجاه القاهرة. لقيت بردو في المعاكس على الكوبري نص نقل جاي بسرعة كنت هلبس فيها بنفس الصورة ووراه توكتوك جاي بردو بسرعة! الكوبري عبارة عن حارتين والحارتين مرسوم على الأسفلت أسهم في أتجاه واحد. يعني الكباري دي أتجاه واحد والservice lanes دي طبعاً طبعاً أتجاه واحد!
طول السكة وأنا راجع القاهرة بقيت عند كل كوبري أشوف العربيات ماشيه عليه فوق أزاي. وكل الكباري عليها تريلات ونص نقل ماشييين عكسي وبينزلوا في الservice lanes بالتبعيه عكسي ومنهم كانت تريلا محملة بالبنزين. كل ده عشان مكسلين يمشوا كام كيلو زياده فبيمشوا عكسي في الservice lane وبيطلعوا الكباري عكسي عشان يوفروا خمسه ولا عشره كيلو.
المصيبة أن هتحصل حوادث تشَيب على الكباري وبالأخص عند الملفات في الكباري دي. تريلا شايله بنزين تروح خابطة في تريلا شايله أي حاجة تانية ويروحوا واخدين بعض بالحضن ونازلين على الطريق السريع. اللي بقوله ده مش خيال. دي حادثة في أنتظار أن تحدث في أي وقت. المسألة مسألة وقت مش أكتر.
واحد هيعمل ناصح ويقولي مهو الservice lane أتجاهين. هقوله لأ مش أتجاهين، وعربيات النقل هي اللي بتفرض أمر واقع أنه أتجاهين بس هو أتجاه واحد ولو أتجاهين ليه الكباري والservice lanes مرسوم على أسفلت الحارتين بتوعهم أسهم بتشاور في أتجاه واحد؟
طب ايه المطلوب من إدارة الطريق؟
- وضع كماين ثابتة عند منزل أو مطلع كل كوبري، أي حد ماشي مخالف تتسحب رخصته ويتمنع من القيادة. ده أنسان كان هيتسبب في قتل عشرات الناس.
- وضع كماين غير ثابتة بطول الservice lanes والقبض على أي واحد ماشي عكسي.
- تركيب كاميرات تصوير ومراقبة أعلى الكباري وبطول الservice lanes وتصوير المخالف وعدم تجديد رخصته ومنعه من القيادة.
- وضع كماين ثابتة عند منزل أو مطلع كل كوبري، أي حد ماشي مخالف تتسحب رخصته ويتمنع من القيادة. ده أنسان كان هيتسبب في قتل عشرات الناس.
- وضع كماين غير ثابتة بطول الservice lanes والقبض على أي واحد ماشي عكسي.
- تركيب كاميرات تصوير ومراقبة أعلى الكباري وبطول الservice lanes وتصوير المخالف وعدم تجديد رخصته ومنعه من القيادة.
ربنا يحمي الجميع إن شاء الله وخدوا بالكم وأنتوا طالعين الكباري دي.
ليست هناك تعليقات:
إرسال تعليق