كلنا عارفين ان يوم تجديد الرخصة بيبقى يوم مالوش اي لازمه، تصحى من النجمه علشان تلحق طابور المخالفات و تضرب اي جينز و تي شيرت و اريح جزمه. و طول مانت رايح تقول لنفسك ما تتعصبش، يوم و يعدي، مصر حلوة، ما جاتش على دي، يا رب مالاقي مدام عفاف و تقعد تلففني على الشبابيك.
سمعت عن خدمه تجديد الرخصه من على الإنترنت دورت و عرفت ان فوري اللي عملاها، كلمتهم و نزلت لمحل جنب البيت عنده فوري.
صباح الفل يا باشا، جددت رخص قبل كده؟
هو:الصراحه ﻷ.
انا:عندك الخدمه؟
هو:ايوه.
انا :طب يلا بينا.
تجديد الرخصه فيه 3 خطوات:
1-تدفع الضريبه (اول ايصال على اليمين)
2-التأمين (تاني ايصال)
3-تدفع المخالفات (تالت ايصال)
و اخر خطوة لو عايز الرخصه توصلك على البيت (رابع ايصال) او تروح تستلمها من المرور بعد 3 ايام.
لقيت الراجل ملخوم قولتله عنك، و مسكت الجهاز كل المطلوب منك:
الرقم القومي
رقم السياره
رقم الموبايل
و خلصت كل الخطوات و حاسبته و مشيت. كل ده كلفني زياده 29 جنيه بالتوصيل للبيت.
بعد نص ساعه فوري كلموني على الموبايل يتاكدوا من العنوان و قالوا الرخصه هاتجيلي على البيت في خلال 7 ايام بارامكس.
بصراحه انا مش مصدق نفسي ان ده بقى في مصر فاضل الشهر العقاري و تبقى تعامل الواحد مع الحكومه انتهى.
طبعا الخدمه دي لو ماعندكش فحص او تغيير ملكيه او حاجات من اللي لازم تروح المرور علشانها، بس ممكن تدفع كل حاجه على فوري و تكمل الناقص في المرور.
شكرا لاداره المرور و لفوري و لحضرة البقال.
إضافة:
تعليق ا رامي احد موظفي فوري:
لو العربية عليها فحص ونفس صاحب العربيه يعنى مش نقل ملكية ممكن يدفع كل حاجه على فورى و يروح بس المرور يفحص ويستلم الرخصة على طول.
و لو بتوكيل الداخليه مانعه اي خدمه تتنفذ يعني لازم يروح المرور على طول.
للإستفسار ممكن تتصل بفوري: 16421
ليست هناك تعليقات:
إرسال تعليق